Një atak në zemër i ka marrë jetën Diana Rakipit, burrneshës që shumë në Durrës e njihnin edhe si “Lali”.
Mësohet se Diana është ndarë nga jeta pasditen e së dielës, në moshën 69-vjeçare, ndërkohë që për shumë vite me radhë ajo është kthyer në një personazh të dashur për mediat kombëtare, por edhe ato ndërkombëtare, që kanë shfaqur interes të mësojnë më shumë për jetën e saj.
Dëshmi e gjallë e zakoneve të hershme shqiptare, shumëkush ishte i interesuar të mësonte më shumë mbi zgjedhjet e kësaj gruaje, që me vullnetin e saj të plotë vendosi ta jetonte jetën si burrneshë.
Bijë në një familje me shumë fëmijë (3 vëllezër e 5 motra) Diana ishte dëshmi e gjallë e traditave të vjetra shqiptare, të përfshira në kanunin e Lek Dukagjinit, ku virgjëreshat e betuara, apo burrneshat, janë gra që ndërmarrin një betim dëlirësie dhe veshin rroba mashkullore për të jetuar si burra në shoqëritë patriarkale të Shqipërisë Veriore, Kosovës dhe Malit të Zi.
“Lali” u betua për t’u kthyer në burrneshë gjatë kohës që Shqipëria ishte ende nën regjimin komunist.
Apeli i saj i vazhdueshëm për gratë dhe vajzat ishte: “Bëhuni të zonjat e vetes merreni fatin tuaj në dorë dhe mos u dorëzoni kurrë përballë asgjëje”. / Euronews Albania
