Ministri për Evropën dhe Punët e Jashtme, Igli Hasani zhvilloi sot një takim me homologun grek, George Gerapetritis, në kuadër të vizitës së tij zyrtare në Greqi.

Duke informuar mbi takimin dypalësh, Hasani bëri të ditur se “biseda ishte e sinqertë dhe me vizion për të ardhmen”.

“Riafirmuam përkushtimin tonë të përbashkët në avancimin e marrëdhënieve dypalëshe, të bazuara në respekt të ndërsjellë, në një linjë strategjike dhe dialog konstruktiv”, shtoi ai.

Kryediplomati shqiptar nënvizoi se “lidhjet tona mbështeten në vlera të përbashkëta, bashkëpunim të ngushtë brenda NATO-s dhe vizionin për një Evropë më të integruar dhe më të bashkuar”.

“Pres me padurim të ndërtojmë mbi këtë moment së bashku”, u shpreh Hasani.