“Forcat e Armatosura nuk janë vetëm simbol i mbrojtjes dhe sigurisë, por edhe shembull i guximit dhe solidaritetit”, u shpreh sot ministri i Mbrojtjes, Pirro Vengu.

Në kuadër të fushatës ndërkombëtare të 16 ditëve të aktivizimit kundër dhunës ndaj grave gratë dhe vajzat në uniformë përcjellin një mesazh të fuqishëm, theksoi Vengu, i cili shtoi se, dhuna ndaj grave nuk është vetëm një çështje personale, por një sfidë për të gjithë shoqërinë.

Në një videomesazh të ndarë nga ministri Vengu, ato shprehen se, “dhuna nuk është zgjidhje, duhet të guxojmë të flasim dhe të kërkojmë ndihmë”.

“Asnjë grua nuk duhet të jetojë me frikë në shtëpinë e saj”, është një tjetër mesazh.

“Kush hesht ndaj dhunës bëhet bashkëfajtor. Denonco dhunën, një veprim i vogël mund të shpëtojë jetë. Një shoqëri e fortë fillon duke siguruar gratë e dhunuara dhe duke i mbrojtur ato”, theksojnë gratë dhe vajzat në uniformë.

“Respekti, dinjiteti janë e drejta themelore e gjithsecilit. Gratë janë forca e shoqërisë, jo viktimë e saj. Mos mbyll sytë, denonco. Ndryshimi fillon nga ne. Ndaj t’i themi stop dhunës për një shoqëri të drejtë dhe të barabartë”, shprehen ato.

“Respekti dhe barazia janë bazat e një shoqërie pa dhunë. Dhuna shkatërron jetë, por ne mund të ndërtojmë një të ardhme të sigurt dhe një të ardhme të drejtë. Gratë meritojnë dashuri, dinjitet dhe jo dhunë. Secila nga ne ka fuqinë të thotë mjaft më, heshtja nuk është zgjidhje, fol për vete dhe për ato që nuk kanë zë. Gruaja nuk është objekt, është themeli i jetës. Lufto për drejtësi, jo për dominim. Mos lejo që dhuna të jetë historia e askujt. Dhuna është e papranueshme në çdo formë dhe në çdo rrethanë. Të mbrojmë gratë është të mbrojmë të ardhmen. Asnjë justifikim. Bashkë kundër dhunës ndaj grave dhe vajzave”, u shprehën ato.

(ATSH)