Oficerja Koordinuese për Diasporën,në Ambasadën e Shqipërisë në Greqi, Joneda Dodaj, mori pjesë në konferencën me temë “𝘒𝘰𝘮𝘶𝘯𝘪𝘵𝘦𝘵𝘪 𝘴𝘩𝘲𝘪𝘱𝘵𝘢𝘳, 𝘨𝘳𝘶𝘢𝘫𝘢 𝘦 𝘴ë 𝘥𝘫𝘦𝘴𝘩𝘮𝘦𝘴, 𝘴ë 𝘴𝘰𝘵𝘮𝘦𝘴 𝘥𝘩𝘦 𝘴ë 𝘯𝘦𝘴ë𝘳𝘮𝘦𝘴”, organizuar nga Organizata jo-fitimprurëse “Jeta”, me presidente znj. Elona Kataro, me mbështetjen e Prefekturës së Atikës – Περιφέρεια Αττικής, e cila u përfaqësua nga Nën Prefekti për Çështjet Kulturore, z. Haris Romas.

Konferenca kishte si synim pasqyrimin e vështirësive dhe stereotipeve, me të cilat gratë shqiptare, të punësuara në sektorët e pastrimit dhe shëndetësisë, dhe jo vetëm, përballen në jetën e tyre të përditshme, si në ambientin e punës, ashtu edhe në atë social, duke u ndalur veçanërisht në promovimin e imazhit dhe të rolit të rëndësishëm të gruas bashkëkohore shqiptare në familje, në punë dhe në shoqëri.

Në fjalën e saj, znj. Dodaj theksoi se aktivitete të kësaj natyre, nderojnë gratë që luftojnë për një të nesërme më shpresëdhënëse për veten dhe familjet e tyre, ato gra, që me forcën e tyre shpirtërore, personalitetin dinamik, durimin dhe këmbënguljen, thyejnë stereotipe, duke frymëzuar dhe fuqizuar brezat e rinj. Ajo vuri në dukje gjithashtu se, Ambasada ka mbështetur dhe do të vazhdojë të mbështesë fuqishëm çdo nismë të komunitetit shqiptar që synon në mbrojtjen e të drejtave të grave, si dhe fuqizimin e tyre ekonomik dhe social.

Në kuadër të këtij aktiviteti, u promovua libri i pedagoges znj. Nefeli Stournara : “𝘗𝘶𝘯ë𝘵𝘰𝘳𝘦 𝘴𝘩𝘦𝘮𝘣𝘶𝘭𝘭𝘰𝘳𝘦 – 𝘕𝘫ë 𝘱ë𝘳𝘲𝘢𝘴𝘫𝘦 𝘯𝘥ë𝘳𝘥𝘪𝘴𝘪𝘱𝘭𝘪𝘯𝘰𝘳𝘦 𝘯ë 𝘥𝘺 𝘴𝘱𝘪𝘵𝘢𝘭𝘦 𝘴𝘩𝘵𝘦𝘵ë𝘳𝘰𝘳𝘦 𝘨𝘳𝘦𝘬𝘦”, një studim shkencor që prek probleme të jetës së përditshme të grave imigrante, të punësuara në spitale greke, i cili trajton këndvështrimet e jetës së tyre në Greqi.