Ministri i Ekonomisë, Kulturës dhe Inovacionit, Blendi Gonxhja ndau sot të dhënat e fundit nga raporti i OECD “Economic Convergence Scoreboard for the Western Balkans 2025”.

Sipas Gonxhes, këto të dhëna dëshmojnë edhe një herë rolin jetik që kanë ndërmarrjet e vogla dhe të mesme (NMV) në ekonominë shqiptare, të cilat i cilëson “shtylla e punësimit në Shqipëri”.

“Një rekord rajonal për Shqipërinë! Në periudhën 2020-2023, 82% e të punësuarve në Shqipëri rezultojnë të angazhuar në NMV. Ky është treguesi më i lartë në të gjithë Ballkanin Perëndimor, duke kaluar gjithashtu mesataren e Bashkimit Europian e cila rezulton në 64,5%, çka e vendos Shqipërinë dukshëm mbi standardin europian sa i përket varësisë së tregut të punës nga NMV-të”, tha Gonxhja në një postim në rrjetet sociale.

Ministri Gonxhja u shpreh se rëndësia e NMV-ve si motor punësimi është edhe më e madhe në Shqipëri sesa në shumë vende të tjera europiane.

“Tregu i punës shqiptar është shumë i varur nga qëndrueshmëria dhe zhvillimi i NMV-ve, ndaj çdo politikë mbështetëse ndaj tyre është një politikë sociale dhe ekonomike njëkohësisht”, tha ai.

Gonxhja nënvizoi se Shqipëria ka një bazë të fuqishme të sipërmarrjeve të vogla dhe të mesme, por për t’i shndërruar ato në burim rritjeje të qëndrueshme raporti thekson se është e nevojshme të ndërmerren disa hapa të rëndësishëm, siç janë: përmirësimi i klimës së biznesit; digjitalizimi; aksesi më i lehtë në financa dhe ngritje të kapaciteteve profesionale.

“Raporti i OECD thekson se pesha e madhe e NMV-ve në tregun shqiptar të punës është një aset, por edhe një sfidë. Politikat për të mbështetur rritjen, inovacionin dhe konkurrueshmërinë e tyre janë thelbësore për procesin e konvergjencës me BE-në”, vijoi ai.

Ministria e Ekonomisë, Kulturës dhe Inovacionit është e angazhuar për nxitjen dhe krijimin e politikave që nxisin zhvillimin e biznesit në funksion të rritjes së punësimit në vend, duke u fokusuar në angazhimet e ndërmarra në kuadër të integrimit evropian.

Burimi ATSH