Gjykata Kushtetuese doli sot me një vendim për çështjen e Erion Veliajt, duke i dhënë të drejtë të vijojë detyrën si kryetar i bashkisë së Tiranës.

Gjykata Kushtetuese ka shqyrtuar kërkesën e Erion Veliajt për shfuqizimin e vendimit të Këshillit të Ministrave për shkarkimin e tij nga detyra e kryetarit të Bashkisë Tiranë, si dhe shfuqizimin e dekretit të Presidentit të Republikës për caktimin e datës së zgjedhjeve të pjesshme për kryetar bashkie në Tiranë.

Pas shqyrtimit, Gjykata vlerësoi se ka kompetencën të shqyrtojë aktet e Këshillit të Ministrave për shkarkimin e kryetarëve të bashkive dhe të kontrollojë përputhshmërinë e këtyre akteve me Kushtetutën, përfshirë edhe vendimet për shkarkim të kryetarëve të bashkive si organe të zgjedhura drejtpërdrejt.

Gjykata gjithashtu konstatoi se në rastin e shkarkimit të Veliajt, procedura e ndjekur nga Këshilli i Ministrave ka shkelur të drejtat për proces të rregullt, duke mos e njoftuar kërkuesin dhe duke mos garantuar të drejtat e tij për t’u dëgjuar dhe për t’u mbrojtur. Kjo ka çuar në cenimin e garancive kushtetuese për proces të rregullt.

Gjykata theksoi se Këshilli i Ministrave nuk ka arsyetuar plotësisht shkarkimin e Veliajt për shkelje të rëndë të Kushtetutës dhe ligjeve, që do të ishte një bazë për të justifikuar këtë masë.

Në këtë kontekst, mbrojtja e interesit publik për t’i garantuar zgjedhësve një kryetar të zgjedhur drejtpërdrejt nuk mund të justifikojë kufizimin e garancive kushtetuese. Në përfundim të shqyrtimit të kësaj çështjeje, për arsyet e mësipërme, Gjykata vendosi, me shumicë votash (5-3) pranimin e kërkesës së Erion Veliajt.

Gjithashtu gjykata vendosi shfuqizimin e vendimit nr. 539, datë 25.09.2025 të Këshillit të Ministrave “Për shkarkimin nga detyra të kryetarit të Bashkisë Tiranë, z. Erion Veliaj”, si të papajtueshëm me Kushtetutën e Republikës së Shqipërisë.

Gjykata vendosi edhe shfuqizimin e dekretit të Presidentit të Republikës nr. 350, datë 01.10.2025 “Për caktimin e datës së zgjedhjeve të pjesshme vendore për kryetar bashkie, për disa njësi të qeverisjes vendore” për pjesën që cakton datën e zgjedhjeve vendore në Bashkinë Tiranë, si të papajtueshëm me paragrafët 2 dhe 3 të nenit 115 të Kushtetutës.

Po ashtu, Gjykata vendosi vazhdimin e masës së pezullimit të dekretit të Presidentit të Republikës nr. 350, datë 01.10.2025 “Për caktimin e datës së zgjedhjeve të pjesshme vendore për kryetar bashkie, për disa njësi të qeverisjes vendore” për pjesën që cakton datën e zgjedhjeve vendore në Bashkinë Tiranë, deri në hyrjen në fuqi të këtij vendimi.
Gjykata bën të ditur se, vendimi përfundimtar do të shpallet i arsyetuar brenda afateve ligjore të parashikuara.

Më 25 shtator, Këshilli i Ministrave e shkarkoi Veliajn me 50 vota pro, pas propozimit të këshillit bashkiak duke u mbështetur në ligjin për qeverisjen vendore, me argumentin se nuk është paraqitur prej 3 muajsh në detyrë.

Më 1 tetor, Presidenti Bajram Begaj dekretoi zgjedhjet e pjesshme edhe për Tiranën, i cili me vendim të ndërmjetëm nga Gjykata Kushtetuese u pezullua deri në shprehjen përfundimtare për shkarkimin e Veliajt.

Veliaj ndodhet në paraburgim që prej 10 shkurtit, pas vendimit të Gjykatës së Posaçme për masën e sigurisë “arrest në burg”, kërkuar nga SPAK.

Veliaj akuzohet në 9 raste për korrupsion pasiv. Gjithashtu akuzohet për pastrim parash, mosdeklarim pasurie, shpërdorim detyre si dhe futjen e sendeve të paligjshme në burg.

Burimi ATSH