Zhvillimi i aviacionit civil ishte në fokus të takimit mes zv/kryeministres Belinda Balluku, njëheraz edhe ministre e Infrastrukturës dhe Energjisë dhe drejtorit Rajonal të ICAO për Europën dhe Atlantikun e Veriut.

Balluku ka ndarë detaje mbi takimin me drejtorin Rajonal të ICAO për Europën dhe Atlantikun e Veriut, Nicolas Rallo.

“Diskutuam mbi zhvillimin e aviacionit civil në Shqipëri, i cili në vitet e fundit ka një rritje të konsiderueshme, si asnjë vend tjetër në Europë”, shkruan Balluku.

Balluku më tej shkruan se Shqipëria ka njohur rritje të konsiderueshme në fushën e aviacionit civil dhe kjo dhe për shkak të një strategjie të qartë të qeverisë së Shqipërisë.

“Një zhvillim i bazuar mbi një strategji të qartë të hartuar nga Qeveria Shqiptare prej disa vitesh, përmes rritjes së aksesit të qytetarëve në aviacion bazuar tek liberalizimi dhe konkurrenca. Gjithashtu edhe investimet për përmirësimin e infrastrukturës aeroportuale. Në proces kemi të tjera projekte, si aeroporti i Vlorës dhe ai i Gjirokastrës, të cilat do të zhvillojnë akoma edhe më shumë këtë sektor”, përfundon Balluku.

(Marrë nga ATSH)