Shoqata e Shkrimtarëve dhe Artistëve në Greqi “LiterArt” shënoi 20-vjetorin e themelimit me një mbrëmje kushtuar krijimtarisë, kujtesës dhe kontributit të artistëve shqiptarë në jetën kulturore mes Shqipërisë dhe Greqisë.

Përvjetori u kujtua me një program artistik, me interpretime nga aktorë profesionistë, muzikë klasike, këngë shqiptare dhe një ekspozitë me punime të piktorëve shqiptarë që kanë ndërtuar karrierën e tyre në Greqi, si edhe me ndarjen e ҫmimemve të mirënjohjes që sipas kryetares së LiterArt-it, znj. Brikena Qama, jo vetëm kanë themeluaur, por edhe kontribuar ndër vite.

Në aktivitet morën pjesë Ambasadorja e Republikës së Shqipërisë, znj. Luela Hajdaraga, Udhëheqësi i Zyrës së Interesave të Kosovës në Greqi, Ambasadori Fitim Gllareva, anëtarë të shoqatës dhe përfaqësues të komunitetit shqiptar.

Duke vlerësuar kontributin e shoqatës gjatë këtyre dy dekadave, Ambasadorja Hajdaraga theksoi se komuniteti i artistëve ka qenë ndër grupimet që, përmes artit në të gjitha dimensionet e tij, ka promovuar kulturën shqiptare, ka ndërtuar ura të qëndrueshme lidhëse me kulturën greke, si dhe ka kontribuar e po kontribuon në një të ardhme të përbashkët.

Përmes artit, letërsisë dhe gjuhës shqipe, LiterArt ka dhënë ndër vite një kontribut të rëndësishëm në ruajtjen e identitetit kulturor shqiptar dhe në forcimin e dialogut kulturor shqiptaro-grek.

Ambasada i uron LiterArt-it një rrugëtim sa më të gjatë e të suksesshëm artistik dhe shpreh mirënjohjen për të gjithë ata që, përmes krijimtarisë dhe përkushtimit të tyre, kanë kontribuar në pasurimin e jetës kulturore dhe në forcimin e miqësisë mes dy vendeve.

📸 Photo credits: Sokol Bara