Ministri për Evropën dhe Punët e Jashtme, Ferit Hoxha, vijon takimet dypalëshe dhe angazhimet shumëpalëshe në Nju-Jork, në kuadër të Javës së Nivelit të Lartë të sesionit të 81-të të Asamblesë së Përgjithshme të Kombeve të Bashkuara.

Ministria për Evropën dhe Punët e Jashtme bëri të ditur se angazhimet e ministrit Hoxha janë në funksion të interesave të Shqipërisë dhe forcimit të partneriteteve ndërkombëtare.

“Shqipëria, partnere aktive dhe e besueshme, me zërin dhe kontributin e saj në çështjet e rëndësishme të agjendës ndërkombëtare”, thuhet në njoftimin e MEPJ-së.

Gjatë qëndrimit në Nju-Jork, Hoxha po zhvillon takime dypalëshe dhe po merr pjesë në angazhime shumëpalëshe në kuadër të punimeve të Asamblesë së Përgjithshme të OKB-së.

Hoxha mori pjesë në drekën e thirrur nga zëvendëspresidentja e Komisionit Evropian dhe Përfaqësuesja e Lartë e BE-së për Punët e Jashtme dhe Politikën e Sigurisë, Kaja Kallas, me liderë dhe ministra të Jashtëm të vendeve të Ballkanit Perëndimor.

Po ashtu, Hoxha mori pjesë në takimin informues të Bordit të Paqes, së bashku me Komitetin Kombëtar për Administrimin e Gazës dhe Zyrën e Përfaqësuesit të Lartë, të mbajtur në Nju-Jork (SHBA).

Burimi ATSH