Pas Ambasadës amerikane dhe kreut të Delegacionit të BE-së Gonzato, edhe ambasadori britanik në Shqipëri, Alastair King-Smith, ka reaguar për dakordësinë e arritur mes mazhorancës dhe opozitës për normalizimin e jetës parlamentare.

Me anë të një reagimi në rrjetin social “X”, King-Smith shprehet se është i vetëdijshëm se kompromiset politike janë të vështira dhe kërkojnë vendosmëri, por thekson se është i kënaqur me progresin e vazhdueshëm drejt rikthimit të jetës normale në Kuvend.

Ai thekson se kjo dakordësi mes palëve në Kuvend është në interesin më të mirë të të gjithë qytetarëve shqiptarë dhe perspektivës së ardhshme të Shqipërisë.

“E di që kompromiset politike janë të vështira dhe kërkojnë guxim dhe vendosmëri. I kënaqur që shoh progresin e vazhdueshëm sot drejt rikthimit të një parlamenti normal, funksional, i cili është në interesin më të mirë të të gjithë qytetarëve shqiptarë dhe perspektivës së ardhshme të Shqipërisë”, shkruan King-Smith.