Ministri i Punëve të Jashtme të Republikës së Greqisë, Nikos Dendias vizitoi Ambasadën e Republikës së Shqipërisë në Athinë.

Lamin e bëri të ditur, ambasada e RSH-së në Athinë me anë të një postimi në rrjetet sociale.

“Të nderuar të mikprisnim në selinë e Ambasadës, ministrin e Jashtëm Nikos Dendias, në një vizitë miqësore e cila shënoi një moment historik në vigjilje të përvjetorit të 52-të të rivendosjes së marrëdhënieve diplomatike midis dy vendeve”.

“Ambasadorja e RSH-së në Athinë, Luela Hajdaraga, shoqëruar nga personeli diplomatik i Ambasadës kanë rezervuar një pritje të ngrohtë tradicionale shqiptare në nder të Dendias, i cili gjatë mandatit të tij si Ministër i Jashtëm ka kontribuar në mënyrë proaktive në lartësimin e nivelit të marrëdhënieve dypalëshe”, thuhet në njoftim.

“Duke e cilësuar si mik të Shqipërisë dhe shqiptarëve, Ambasadorja Hajdaraga i ka shprehur Ministrit Dendias mirënjohjen e veçantë për rolin e tij, me bindjen se lidhjet historike mes popujve tashmë janë konvertuar pakthyeshmërisht në bashkëpunime konstruktive mes dy vendeve tona dhe në rajon më gjerë”, thekson ambasada.

Ministri Dendias ka marrë pjesë si i ftuar special nga Ambasadorja Hajdaraga, në drekën e punës shtruar në kuadër të takimit të grave ambasadore të akredituara në Greqi.