Kryeministri Edi Rama deklaroi sot se e drejta e vetos nuk është e drejtë që i bën mirë Bashkimit Europian dhe as vendeve anëtare.

Në një konferencë të përbashkët për shtyp me Presidenten e Komisionit Europian, Ursula von der Leyen, kryeministri Rama theksoi se Shqipëria ka qenë në mënyrë të përsëritur viktimë e ushtrimit të së drejtës së vetos, ose e një mekanizmi i cili në kohët e sotme është një mekanizëm i tejkaluar.

Ndërkohë Rama tha se “ne do të shikojmë se si traktatet e ardhshme të anëtarësimit do të përpilohen”, ndërsa bëri të ditur se traktatet e mëparshme për ish-vendet kandidate që tashmë janë shtete anëtare, kanë pasur disa masa sigurie.

“Kjo është gjë e mirë që ne i dimë dhe do të shikojmë pra se si këto traktate anëtarësimi në të ardhmen do të kenë disa masa të tilla. Ato angazhime që ndërmerren gjatë procesit të anëtarësimit duhet të vijojnë edhe pasi një shtet të jetë bërë shtet anëtar. Pra do të vazhdojmë të punojmë për këtë projekt, por do të vazhdojmë të flasim për të në të ardhmen”, u shpreh Rama.

Po ashtu, kryeministri theksoi se Shqipërisë nuk i duhet ndonjëherë vetoja për të bërë të fortin në tryezën e një familje ku duhet të ndihemi të privilegjuar që të jemi pjesë si të barabartë mes të barabartësh.

Burimi ATSH