Presidentja e Komisionit Evropian, Ursula von der Leyen, tha se puna për paketën e re të zgjerimit të Bashkimit Evropian vijon, ndërsa theksoi se traktatet e ardhshme të anëtarësimit mund të përfshijnë masa sigurie, të ngjashme me ato të parashikuara në traktatet e mëparshme.

E pyetur në konferencën e përbashkët për shtyp që dha sot me kryeministrin Edi Rama nëse paketa e re do të favorizojë apo diskriminojë vendet anëtare, Von der Leyen tha se ende nuk mund të japë detaje.

“Ne po vazhdojmë të punojmë për atë paketë, kështu që nuk mund të hyj në hollësi. Megjithatë, ajo që mund të them është që ne do të shikojmë se si traktatet e ardhshme të anëtarësimit do të përpilohen”, u shpreh ajo.

Von der Leyen theksoi se traktatet e mëparshme të anëtarësimit, për vendet që tashmë janë anëtare të BE-së, kanë përfshirë disa masa sigurie.

“Informacion shumë i rëndësishëm për ju është që traktatet e mëparshme për ish-vendet kandidate, që tashmë janë vende anëtare, kanë pasur disa masa sigurie. Që të ekzistojnë këto lloj masash është gjë e mirë që ne e dimë dhe do të shikojmë sesi këto traktate anëtarësimi në të ardhmen do të kenë disa masa të tilla”, deklaroi Presidentja e KE-së.

Ajo nënvizoi se angazhimet e ndërmarra gjatë procesit të anëtarësimit duhet të vazhdojnë të respektohen edhe pasi një vend të bëhet anëtar i Bashkimit Evropian.

“Siç e thashë, ato angazhime që ndërmerren gjatë procesit të anëtarësimit duhet të vijojnë edhe pasi një shtet është bërë shtet anëtar”, tha Von der Leyen.

“Pra, do të vazhdojmë të punojmë për këtë projekt, por do të vazhdojmë edhe të flasim për të në të ardhmen”, u shpreh ajo.

Burimi ATSH