Ministrja e Ekonomisë dhe Inovacionit, Delina Ibrahimaj, mori pjesë sot në Forumin e Biznesit Shqipëri–Japoni 2025, i mbajtur në Tiranë, një ngjarje e rëndësishme që synon forcimin e partneritetit ekonomik dhe nxitjen e bashkëpunimit mes dy vendeve në sektorët privatë.

Gjatë fjalës së saj, ministrja vuri në dukje marrëdhëniet historike dhe të qëndrueshme mes Shqipërisë dhe Japonisë, duke pasur parasysh mbështetjen e vazhdueshme përmes projekteve të JICA-s, të cilat kanë pasuruar sektorë të ndryshëm si bujqësia, infrastruktura, mjedisi dhe shëndetësia.

Ministrja Ibrahimaj foli për momentin e rëndësishëm të zhvillimit që po kalon Shqipëria, duke theksuar se reformat strukturore, digjitalizimi i administratës dhe përmirësimi i klimës së biznesit kanë hapur mundësi të reja për investime.

Ibrahimaj e cilësoi këtë periudhë si një mundësi të shkëlqyer për përparimin e sektorëve kyç, veçanërisht në energji dhe infrastrukturë, si dhe për adoptimin e teknologjive inovative që mund të kontribuojnë në transformimin e ekonomisë.

Në vazhdim, ministrja u shpreh për rëndësinë e forumeve të tilla si mundësi për të ndërtuar lidhje të forta mes bizneseve shqiptare dhe japoneze.

“Qeveria shqiptare mbetet plotësisht e angazhuar të mbështesë çdo iniciativë që sjell investime, teknologji dhe ekspertizë japoneze në vendin tonë. Ne jemi të gatshëm të punojmë krah për krah me kompanitë japoneze për identifikimin e projekteve me interes të përbashkët; lehtësimin e procedurave administrative; ofrimin e mbështetjes institucionale; dhe krijimin e kushteve konkurruese për investime afatgjata”, deklaroi Ibrahimaj.

Përveç kësaj, Ibrahimaj foli për potencialin e sektorit privat shqiptar, i cili është dinamik dhe ka një fuqi punëtore të aftë për të udhëhequr zhvillimin e qëndrueshëm dhe inovativ.

Në lidhje me investimet, Ministrja Ibrahimaj ndau shifra të rëndësishme, duke përmendur se stoku i investimeve direkte japoneze në Shqipëri gjatë periudhës 2019-2024 ka lëvizur nga 0,11 deri në 0,3 milionë euro, me investimin më të madh nga SEWS-CABIND Albania, pjesë e grupit Sumitomo Electric.

Po ashtu, eksportet shqiptare drejt Japonisë arritën në mbi 8,4 milionë dollarë në vitin 2024, ndërsa importet nga Japonia kapën vlerën e 41,9 milionë dollarëve.

Ministrja shprehu bindjen se ky forum do të kontribuojë në zhvillimin e mëtejshëm të marrëdhënieve ekonomike dhe do të hapë mundësi të reja për projekte të suksesshme.

Burimi ATSH