Forca Ajrore po merr pjesë në stërvitjen shumëkombëshe ajrore “INIOCHOS 2026”, që po zhvillohet në Bazën Ajrore Andravida, Greqi, për një periudhë dyjavore, nën drejtimin e Forcës Ajrore greke.

Në këtë aktivitet marrin pjesë disa vende aleate dhe partnere, ndër të cilat Franca, Sllovenia dhe Shqipëria me mjete ajrore, si dhe Polonia me Forcat Speciale. Gjithashtu, Gjeorgjia, Serbia, Kroacia dhe India marrin pjesë me ekipe vëzhguesish.

FA, në këtë stërvitje u përfaqësua me një helikopter tip Cougar, një automjet taktik Land Rover dhe një personel prej 11 vetash, të përbërë nga pilotë, teknikë, mekanikë dhe operatorë bordi.

Pjesëmarrja në këtë stërvitje kontribuon në rritjen e ndërveprueshmërisë me forcat ajrore aleate dhe mbështet implementimin e objektivit të NATO-s për “gatishmërinë e dislokimit të kapaciteteve ajrore”.

Gjatë fazës së ekzekutimit, ekuipazhi i FA realizoi 5 misione fluturimi për transport trupash, me një kohë totale fluturimi prej 10 orë e 10 minuta, si dhe 2 misione rikonjicioni.

Misionet e transportit u zhvilluan në bashkëpunim të ngushtë me Forcat Speciale polake, duke përfshirë skenarë infiltrimi dhe CASEVAC, në përputhje me standardet dhe procedurat e NATO-s.

Pas çdo fluturimi u kryen inspektime teknike sipas kërkesave të mirëmbajtjes, ndërsa pjesa tjetër e aktivitetit përfshiu brifingje operacionale, planifikim misioni dhe analiza pas veprimit.

Pjesëmarrja e FA në “INIOCHOS 2026”, po konfirmon nivelin e lartë të përgatitjes profesionale dhe aftësinë për të operuar në mjedise shumëkombëshe, duke kontribuar në forcimin e kapaciteteve operacionale dhe integrimin në operacionet ajrore të Aleancës.

Marrë nga ATSH