Ministri i Ekonomisë, Kulturës dhe Inovacionit, Blendi Gonxhja bëri të ditur se përmes Aktit Normativ për ndryshime në buxhetin e vitit 2024 është siguruar më tepër mbështetje për artin, kulturën, trashëgiminë dhe arsimin profesional.

Ai renditi disa nga projektit që do të marrin financim.

“Hartimi i Planit të Menaxhimit të Integruar të qyteteve Berat dhe Gjirokastër, përforcimi i shkëmbit nën kullën e sahatit, Kalaja e Krujës, rikonstruksion i muzeut Arkeologjik, Korçë, ndërhyrje emergjente në objekte të pasurisë kulturore, në bashkitë Elbasan, Korçë, Lushnjë, Dibër dhe Gjirokastër, si dhe hartimi i projektit për muzeun e Arbëreshëve”, renditi ministri.

Po ashtu, Gonxhja u shpreh se mbështetje do të marrë edhe biletimi qendror online për muzetë dhe sitet e trashëgimisë kulturore, qendra Art dhe Kulturë Korçë (vegla muzikore, kondicionim, aspirim).
Do të financohet edhe rikonstruksioni i Qendrës së Kulturës, Kamzë, Galerisë së Arteve Pamore “Aleksandër Xhuvani”, Elbasan, linja muzeore e Galerisë Kombëtare të Arteve (Muzeut të Arteve të Bukura), sistemet e HVAC në Teatrin “Migjeni”, Shkodër.

Përmes këtij akti është siguruar edhe një shtesë financimi për Javët Kulturore Ndërkombëtare.

Me fonde shtesë janë mbështetur edhe DRTK-të dhe institucionet kulturore, Muzeu Kombëtar i Fotografisë “Marubi”, QKKF, GKA, BKSH, IKTK, Qendra Muzeore Berat dhe Krujë, etj.

Ministri shtoi se mbështetje do të marrë edhe zhvillimi i inovacionit dhe teknologjisë.

“Inovacioni dhe teknologjia janë faktorë të rëndësishëm për rritjen ekonomike. Me qëllim promovimin e inovacionit, njohjen me teknologjitë e reja, vlerësimin dhe testimin e zgjidhjeve inovatore përpara aplikimit të tyre, nisim punën për konceptimin e Qendrës për Inovacion dhe Zhvillim, si epiqendra shqiptare dhe bërthama e orientimit për këtë sektor. Programi përfshin krijimin e një laboratori për teknologjinë “Tech Laboratory”, ku do të zhvillohet, testohet dhe demonstrohet krijimi i teknologjive të reja”, tha ai.

Mbështetje do të marrë edhe Agjencia Shqiptare për Zhvillimin e Investimeve për nxitjen e investimeve dhe sektori për strehimin social dhe kushtet e banimit.

“Sigurohet mbështetje shtesë për tre bashki, Elbasan, Dibër dhe Mat për financimin e përmirësimit të kushteve të banimit dhe sanitare për familjet në nevojë”, tha ai.

Ministri Gonxhja theksoi se mbështetje historike shkon për arsimin profesional.

“Për vitin mësimor 2024-2025, kemi arritur një numër rekord të regjistrimeve në klasë të 10-të, me 4 400 nxënës, ose 10% krahasuar një vit më parë. Ndaj vijojmë me përmirësimin e infrastrukturës, ku objektivi është krijimi i kampuseve te arsimit professional”, deklaroi Gonxhja.

Me Aktin Normativ u alokuan fonde shtesë për rindërtimin e shkollës mekanike “Hasan Gina” Lushnje, shkollës “Bajram Curri”, Kukës, shkollës “Enver Qiraxhi”, Pogradec, shkollës “Pavarësia”, Vlorë, shkollës tregtare (drejtimi Hoteleri-Turizëm), Vlorë, shkollës “Kolin Gjoka”, Lezhë, shkollave “Arben Broci” dhe “Hamdi Bushati”, Shkodër, shkollës teknike, Korçë, ndërtimi prej fillimit të shkollës “Karl Gega”, Tiranë, si dhe Qendrës së Formimit Profesional, Tiranë.

Ndërsa, informoi po ashtu se janë hapur procedurat për rindërtimin e 6 konvikteve të shkollave profesionale, konkretisht në Vlorë, Lushnjë, Elbasan, Dibër, Kukës, Shkodër, që do të zbatohen nga FSHZH.

Mbështetje shtesë do të ketë edhe për Programin e Kodimit që zbatohet nga AKPA.

(ATSH)