Ministrja për Evropën dhe Punët e Jashtme, Olta Xhaçka u shpreh sot, pasi votoi në qendrën e saj, krenare për përmbylljen e fushatës që e cilësoi “ndoshta më miqësore me qytetet e mjedisin që ka njohur ndonjëherë Shqipëria”.

“Qytetarët kanë pasur mundësinë të vlerësojnë punën e bërë në mandatin që u mbyll dhe angazhimet e kandidatëve për të ardhmen. Tani është momenti të zgjedhin, me shpresën se do ta bëjnë këtë sa më të shumtë në numër, për ta ushtruar masivisht këtë përgjegjësi të rëndësishme qytetare!”, deklaroi Xhaçka.

Në gjithë vendin, sot mbahen zgjedhjet lokale prej nga do të dalin 61 kryetarët e ardhshëm të bashkive.