Ministri i Drejtësisë, Toni Gogu, u bëri sot thirrje magjistratëve të rinj që ta ushtrojnë pushtetin që u jep ligji me integritet, përulësi dhe ndërgjegje, duke theksuar se besimi i qytetarëve te drejtësia ndërtohet jo vetëm mbi ligjin, por mbi karakterin e atyre që e zbatojnë atë.

Në ceremoninë e diplomimit të Shkollës së Magjistraturës, ministri tha se reforma në drejtësi ka hyrë në një etapë të re, ku suksesi nuk do të matet më nga ngritja e institucioneve, por nga cilësia e vendimeve, respektimi i të drejtave të njeriut dhe besimi që qytetarët do të kenë te sistemi.

“Nga kjo ditë e tutje, reforma nuk ka më fytyrën e ligjeve. Ka fytyrën tuaj,” u shpreh ministri.

Në fjalën e tij, ai theksoi se magjistratët ushtrojnë një pushtet të veçantë mbi jetën, liritë dhe të drejtat e qytetarëve, ndaj ky profesion kërkon më shumë sesa njohuri juridike.

“Çdo profesion i beson njeriut pushtet. Magjistrati ushtron pushtet mbi të drejtat dhe liritë e tjetrit. Prandaj profesioni juaj nuk kërkon vetëm dije juridike. Kërkon karakter,” tha ai.

Ministri nënvizoi se edhe pushteti gjyqësor duhet të njohë kufijtë e tij, duke kujtuar se Kushtetuta, procedurat dhe Konventa Evropiane për të Drejtat e Njeriut vendosin kufij mbi ushtrimin e pushtetit, por ekziston edhe një kufi që nuk mund ta vendosë asnjë ligj.

“Kushtetuta i vendos kufij pushtetit të shtetit. Ndërgjegjja i vendos kufij pushtetit të magjistratit.”

Një pjesë të rëndësishme të fjalimit ministri ia kushtoi integritetit dhe përulësisë profesionale, duke paralajmëruar se rreziku më i madh për një magjistrat nuk është vetëm korrupsioni apo presioni, por humbja e aftësisë për të reflektuar.

“Ka vetëm një pyetje që nuk duhet të pushoni kurrë së bërë vetes: ‘A mund të jem gabim?’ Nëse një ditë pushoni së bërë këtë pyetje, mund të ketë filluar të ndodhë e kundërta”, tha Gogu.

Në mbyllje, ministri u kërkoi magjistratëve të mos synojnë popullaritetin, por drejtësinë, duke theksuar se edhe pala që humbet një proces duhet të largohet me bindjen se është dëgjuar, është trajtuar me dinjitet dhe se pushteti mbi të është ushtruar brenda kufijve të ligjit.

“Besimi është forma më e lartë e autoritetit që mund të ketë drejtësia,” përfundoi ministri.

Burimi ATSH