Duke iu përgjigjur interesit të medieve, për kalimin në pronësi të shtetit të kompanisë së prodhimit të dokumenteve të identitetit dhe çmimin e tyre, ministri i Brendshëm, Bledi Çuçi shpjegoi se, “është një marrëdhënie kontraktore me kompaninë e cila mbaron në fund të korrikut të këtij viti”.

“Ne si qeveri, do të përfundojmë kontratën dhe do të marrim në dorëzim të gjithë kompaninë e prodhimit të kartave. Pastaj, vendosja e çmimit, sigurisht, pasi ne ta marrim në administrim këtë kompani, çështja e çmimit është një çështje që vendoset. Jemi shumë më fleksibël për t’i vendosur dhe për t’i ndryshuar çmimet se sa më përpara, kur fiksohej me një kontratë të caktuar që miratohej me ligj, dhe do duhej që përveçse të negocioje me kompaninë, do të duhej të ndryshoje edhe ligjin”, tha ministri Çuçi, në prononcimin për mediet, pas mbledhjes së qeverisë.

Ai tha se, “jemi shumë fleksibël, dhe kjo jo domosdoshmërisht lidhet me ndryshimin e ligjit. Pa diskutim për dokumentet e identitetit do të shohim hapësirat tona për t’ia lehtësuar në maksimum shtetasve”. /ATSH