Drejtorja e Agjencisë Kombëtare të Shoqërisë së Informacionit (AKSHI), Linda Karçanaj tha se, “Shqipëria është e angazhua për avancimin në fushën e sigurisë kibernetike dhe bashkëpunimit ndërkombëtar në këtë drejtim”.

E pranishme në takimin e Grupit të Punës mbi Sigurinë në funksion të Teknologjisë së Informacionit dhe Komunikimit (OEWG), që zhvilloi punimet në Nju-Jork, Karçanaj theksoi se, “Shqipëria ka hedhur hapa të rëndësishëm në forcimin e mbrojtjes kibernetike, në përputhje të plotë me standardet më të larta ndërkombëtare”.

Ajo i njohu të pranishmit me punën e bërë deri më tani për të siguruar transaksione dhe autentifikime të sigurta për qytetarët dhe bizneset, duke harmonizuar legjislacionin me rregulloret e BE-së, për të mundësuar një tregti digjitale të sigurt.

Karçanaj u ndal në nismat konkrete që janë ndërmarrë, ku veçoi: Identifikimi elektronik (e-ID) dhe shërbimet digjitale të besueshme, duke siguruar transaksione dhe autentifikime të sigurta; Harmonizim me rregulloren e re të BE-së e-IDAS 2.0, duke mundësuar tregtinë digjitale, të sigurt dhe pa ndërprerje përtej kufijve.

“Shqipëria është plotësisht e angazhuar për të ndarë informacion mbi kërcënimet kibernetike me partnerët ndërkombëtarë dhe për të zhvilluar ekipe të reagimit ndaj incidenteve të sigurisë, si një pjesë e rëndësishme e përpjekjeve në garantimin e një hapësire digjitale të sigurt”, u shpreh Karçanaj.

Sipas saj, për zhvillimin e strategjive të mbrojtjes kibernetike në nivelin e NATO-s, me përdorimin efikas të Inteligjencës Artificiale, synojmë të parandalojmë e zbulojmë më shpejt kërcënimet eminente.

Karçanaj nënvizoi se, “Shqipëria është e vendosur të rikonfirmojë angazhimin për të bashkëpunuar me shtetet anëtare të Kombeve të Bashkuara dhe partnerët ndërkombëtarë, për të forcuar bashkëpunimin shumëpalësh për një të ardhme digjitale të sigurt dhe të qëndrueshme”.

“Hapësira digjitale nuk mund të kthehet në një teatër tjetër konflikti. Le ta përdorim atë si një mjet për të siguruar paqen, zhvillimin e qëndrueshëm dhe të drejtat e njeriut për të gjithë”, tha ajo.

Burimi ATSH