Presidenti i Ukrainës, Volodymir Zelensky uroi sot Kryeministrin Edi Rama për riemërimin e tij në këtë detyrë.

Në një mesazh në rrjetet sociale, Zelensky shprehet se pret me padurim vijimin e bashkëpunimit.

“Urime Edi Ramës për riemërimin e tij si Kryeministër i Shqipërisë. Pres me padurim të vazhdojmë dialogun tonë të shkëlqyer dhe të punojmë së bashku për të arritur paqe dhe siguri të qëndrueshme për të gjithë Evropën”, u shpreh Presidenti Zelensky.

Zelensky i uroi kryeministrit Rama çdo sukses në zbatimin e planeve të tij ambicioze për Shqipërinë, përfshirë edhe në rrugën e saj drejt anëtarësimit në Bashkimit Europian.

“Së bashku, do të përparojmë vlerat tona të përbashkëta dhe një të ardhme të sigurt dhe të begatë për kombet tona në Evropë, e cila është e fortë dhe e bashkuar”, u shpreh presidenti ukrainas.

Kuvendi i Shqipërisë miratoi sot me 82 vota pro programin qeverisës për katër vitet e ardhshme dhe përbërjen e Këshillit të Ministrave.

Presidenti Zelensky vizitoi për herë të parë Shqipërinë në datat 27-28 shkurt 2024, në kuadër të Samitit “Ukrainë – Europa Juglindore” që u zhvillua në Tiranë. Ky samit u bashkorganizua nga Kryeministri Edi Rama dhe presidenti ukrainas, Zelensky.

Në 15 maj 2025, Zelensky vizitoi sërish Shqipërinë për të marrë pjesë në punimet e samitit të Komunitetit Politik Evropian. Në fokus të këtij samiti ishin siguria dhe qëndrueshmëria demokratike e Evropës, që përfshin mbështetjen për Ukrainën në përpjekjet e saj për një paqe të drejtë dhe të qëndrueshme.

Burimi ATSH