Akademia e Shkencave e Shqipërisë dhe Universiteti i Elbasanit “Aleksandër Xhuvani” kanë firmosur një marrëveshje bashkëpunimi, e cila synon të thellojë lidhjet ndërinstitucionale dhe të nxisë zhvillimin e përbashkët në fushën e kërkimit shkencor dhe formimit akademik të brezave të rinj.

Marrëveshja u nënshkrua nga Kryetari i Akademisë së Shkencave, Skënder Gjinushi dhe rektorja e Universitetit të Elbasanit, Elvira Fetahu duke shënuar një hap të rëndësishëm drejt krijimit të një platforme të qëndrueshme bashkëpunimi ndërmjet dy institucioneve, me synim avancimin e dijes dhe rritjen e cilësisë në arsimin e lartë.

Në fokus të saj është zhvillimi i studimeve dhe hulumtimeve shkencore në të gjitha fushat e dijes, si dhe përfshirja aktive e studentëve dhe studiuesve të rinj në projekte kërkimore.
Nisma është në përputhje me strategjinë e Akademisë së Shkencave për hapje dhe bashkëpunim me komunitetin akademik, si dhe me politikat e Universitetit të Elbasanit “Aleksandër Xhuvani” për zgjerimin e partneriteteve dhe rritjen e ndërveprimit institucional.

Përmes kësaj marrëveshjeje synohet krijimi i një kuadri të qartë bashkëpunimi, i cili përcakton format dhe mekanizmat e ndërveprimit ndërmjet strukturave përkatëse të të dyja institucioneve.
Bashkëpunimi do të përfshijë organizimin e aktiviteteve të përbashkëta, projekte kërkimore, konferenca shkencore dhe shkëmbime akademike.