Kryeministri Edi Rama deklaroi sot se Banka Shqiptare e Zhvillimit do të shërbejë për të mbështetur zhvillimin përmes projekteve të sipërmarrjes që nuk financohen lehtësisht nga bankat komerciale.

Në një takim në Kuçovë me përfaqësues të bizneseve të vogla dhe të mesme të zonave rurale, Rama u ndal te vështirësitë që ndeshin këto sipërmarrje për financime nga bankat.

“Bankat janë skeptike. Ne kemi bërë një marrëveshje me ta ku çdokujt që do të vijë për të kërkuar leje për të ndërtuar agroturizmin, do të ketë mbrapa AZHBR-në e cila do ta ndihmojë për bankën, pavarësisht se vetë AZHBR mund të mos jetë financuesi direkt”, tha Rama.

Kryeministri informoi se ligji për Bankën Shqiptare të Zhvillimit është miratuar tashmë.

“Kemi punuar dy vjet për Bankën e Zhvillimit me ‘Cassa Depositi e Prestiti’. Kemi bërë komplet skemën dhe do të jetë një bankë e menaxhuar bashkërisht me italianët, me nivelin më të lartë të standardit të menaxhimit. Një bankë që ekzaktësisht do të shërbejë për të mbështetur zhvillimin përmes projekteve të sipërmarrjes që janë jo lehtësisht të financueshme nga bankat komerciale”, tha Rama.

Kryeministri theksoi se çdo projekt zhvillimor, jo lehtësisht i financueshëm nga banka komerciale do të mbështetet nga Banka e Zhvillimit.

Burimi ATSH