Presidenti Bajram Begaj, mori pjesë sot në aktivitetin e organizuar me rastin e 100-vjetorit të krijimit të Prefekturës së Tiranës, ku vlerësoi rolin historik të këtij institucioni në forcimin e administratës shtetërore dhe lidhjen mes qeverisjes qendrore dhe komuniteteve vendore.

Në fjalën e tij, Begaj theksoi se një shekull histori e Prefekturës së Tiranës përfaqëson një rrugëtim të gjatë përgjegjësie, përkushtimi dhe transformimesh të rëndësishme në zhvillimin e shtetit shqiptar.

“Krijimi i Prefekturës së Tiranës në vitin 1926 përkoi me një vullnet të madh kombëtar për modernizimin e vendit dhe forcimin e autoritetit të ligjit. Që prej asaj kohe, ky institucion ka shërbyer si një urë lidhëse e pacenueshme midis qeverisjes qendrore dhe komuniteteve vendore, duke garantuar stabilitet, rend dhe zhvillim”, u shpreh Presidenti.

Begaj vlerësoi transformimin e Tiranës gjatë një shekulli, duke theksuar se kryeqyteti është shndërruar në zemrën politike, ekonomike dhe kulturore të vendit, si dhe një simbol të aspiratave të Shqipërisë moderne.

Presidenti shprehu mirënjohje për të gjithë prefektët, nëpunësit dhe punonjësit e administratës që kanë kontribuar ndër vite në ndërtimin e traditës shtetformuese dhe forcimin e institucioneve publike.

Duke iu referuar zhvillimeve aktuale në vend, Begaj theksoi rëndësinë e respektimit të Kushtetutës dhe të drejtave themelore të qytetarëve.

“E drejta për t’u shprehur dhe për të marrë pjesë në jetën publike është një vlerë e mbrojtur nga Kushtetuta, e cila duhet të ushtrohet në pajtim me Kushtetutën dhe ligjet e vendit”, deklaroi ai.

Sipas Presidentit, konsolidimi i demokracisë dhe zhvillimi i qëndrueshëm i vendit mbështeten në angazhimin e përbashkët të qytetarëve dhe institucioneve për të vepruar në përputhje me Kushtetutën, shtetin e së drejtës dhe interesin publik.

Begaj ritheksoi angazhimin e tij në mbrojtje të Kushtetutës, të drejtave dhe lirive themelore të qytetarëve, si dhe në nxitjen e dialogut dhe bashkëpunimit në funksion të interesit kombëtar, integrimit evropian dhe vlerave euroatlantike të Shqipërisë.

Në përfundim të fjalës së tij, Presidenti bëri thirrje për rritjen e cilësisë së shërbimeve publike dhe forcimin e besimit të qytetarëve tek institucionet.

“Të kërkojmë më shumë nga vetja dhe nga njerëzit e shërbimit publik. Të rrisim cilësinë, sepse duke rritur cilësinë forcojmë besimin”, u shpreh Begaj.

Burimi ATSH