Së shpejti Universiteti i Shkodrës do të përfitojë nga një projekt i ri infrastrukturor, i cili synon përmirësimin e kushteve për studentët, pedagogët dhe veprimtarinë kërkimore-shkencore.

Lajmin e dha ministrja e Arsimit, Mirela Kumbaro, e cila zhvilloi sot një takim me rektoren në detyrë të Universitetit “Luigj Gurakuqi” të Shkodrës, Prof. Dr. Blerta Dragusha, me të cilën diskutoi mbi projektet dhe prioritetet për zhvillimin e mëtejshëm të institucionit të arsimit të lartë.

Përmes një postimi në rrjetet sociale, Kumbaro theksoi se, investimi i rëndësishëm do të përmirësojë kushtet për studentët, pedagogët dhe aktivitetin kërkimor-shkencor, si pjesë e angazhimit të qeverisë për universitete moderne, me standarde europiane, që krijojnë më shumë mundësi për të rinjtë shqiptarë për të studiuar, kërkuar, inovuar dhe ndërtuar të ardhmen e tyre në Shqipëri

Kumbaro gjithashtu vlerësoi rolin e Universitetit të Shkodrës në formimin e brezave të tërë profesionistësh dhe kontributin e tij në kërkimin shkencor dhe zhvillimin rajonal.

“Universiteti i Shkodrës ka luajtur një rol të pazëvendësueshëm në formimin e brezave të tërë profesionistësh, duke qenë një qendër e rëndësishme e dijes, kërkimit shkencor dhe zhvillimit rajonal”, u shpreh ministrja.

Ajo theksoi se universiteti do të vijojë të ketë mbështetjen e plotë të Ministrisë së Arsimit në rrugën e zhvillimit, në vazhdimësi të punës së nisur me shumë përkushtim nga profesor Tonin Gjuraj për modernizimin dhe fuqizimin e universitetit.

Burimi ATSH