Ministri i Punëve të Brendshme, Besfort Lamallari, zhvilloi një vizitë në selinë e Europol në Hagë, ku u takua me drejtorin ekzekutiv në detyrë, Jürgen Ebner, si dhe me përfaqësues të qendrave të specializuara të agjencisë kundër krimit të organizuar dhe krimit ekonomik.

Gjatë takimit, Lamallari bëri me dije se diskutuan për forcimin e mëtejshëm të bashkëpunimit mes Shqipërisë dhe Europol, me fokus në luftën kundër trafikut të drogës, grupeve kriminale, trafikimit të qenieve njerëzore, krimit financiar dhe mashtrimeve online.

Lamallari nënvizoi se Shqipëria ndodhet në një fazë vendimtare të procesit të integrimit europian dhe po dëshmon çdo ditë se vepron si një partner i përgjegjshëm dhe i besueshëm, duke kontribuar në sigurinë e përbashkët europiane me të njëjtin angazhim si vendet anëtare të BE.

“Bashkëpunimi i ngushtë i Policisë së Shtetit me Europol dhe pjesëmarrja aktive në operacionet e përbashkëta, janë dëshmi konkrete e këtij përkushtimi. Bashkërendojmë punën për ta çuar këtë partneritet në një nivel edhe më të lartë”, theksoi ministri.

Në përfundim të takimit, u riafirmua angazhimi i përbashkët për ta çuar bashkëpunimin mes Shqipërisë dhe Europol në një nivel edhe më të lartë, përmes shkëmbimit të informacionit, koordinimit operacional dhe intensifikimit të veprimeve kundër krimit të organizuar në të gjitha format e tij.

Gjatë vizitës në Hagë, Lamallari u takua gjithashtu me homologun holandez, si dhe me presidentin e Eurojust.

Burimi ATSH