Ministri i Shtetit për Marrëdhëniet me Parlamentin, njëkohësisht dhe drejtues politik për Diasporën, Taulant Balla kërkoi sot konsensusin e opozitës për të krijuar lehtësi për qytetarët shqiptarë që jetojnë jashtë, por që për t’u pajisur me shtetësinë e vendit ku ata jetojnë janë të detyruar të lënë atë shqiptare.

Balla tha se ky propozim do të vijë në Kuvend si nismë deputeti, ndërsa i kërkoi opozitës të mos e refuzojë atë me pretendimin se shkelet Kodi Zgjedhor.

“Nevojitet procedurë e përshpejtuar për rimarrjen e shtetësisë për qytetarët që u është dashur të lënë shtetësinë. Kuvendi të mundësojë krijimin e një korsie të veçantë procedurale për marrjen e shtetësisë,” tha Balla.

Ai tha se ka një numër të lartë shqiptarësh që po kërkojnë të rimarrin shtetësinë.

“Një pjesë e qytetarëve shqiptarë, bazuar në ligjin gjerman, iu desh të linin shtetësinë shqiptare. Por nga qershori 2024 është hequr ky detyrim dhe një numër i lartë shqiptarësh kanë aplikuar pranë konsullatave tona në Berlin apo Mynih këto muaj për të marrë shtetësinë,” theksoi Balla.

Kjo, pasi sipas tij, Shqipëria nuk është ajo që ata lanë, por një atraksion turistik dhe i bën shqiptarët të jenë krenarë për Shqipërinë e tyre