Ministri i Ekonomisë, Kulturës dhe Inovacionit Blendi Gonxhja, priti në një takim sopranon e mirënjohur shqiptare, Ermonela Jaho.

“Nder dhe kënaqësi të mirëprisnim sot Ermonela Jahon, ambasadoren e kulturës shqiptare në botë, që ngriti peshë zemrat e gjithë artdashësve para disa ditësh në skenën e Teatrit Kombëtar të Operas, Baletit dhe Ansamblit Popullor”, shkroi Gonxhja në rrjete sociale.

Gonxhja bëri të ditur se me sopranon Jaho diskutoi për rolin e saj të rëndësishëm në promovimin e vlerave kombëtare në skenat më të mëdha të botës.

Gjithashtu tha ai, projektet e vitit 2025 do të jenë me plot surpriza për publikun.

“Është një bashkëpunim që premton shumë për të ardhmen e kulturës shqiptare”, tha Gonxhja.

Sopranoja shqiptare Ermonela Jaho është një ndër më të suksesshmet dhe më të njohura në botë, me një zë brilant. Me albumin e saj “Anima Rara” ajo ka marrë vlerësime të shumta. Albumi doli në treg në mbarë botën në formatin fizik dhe digjital, më 25 shtator të vitit 2020.

Ndërkohë që Ermonela fitoi edhe çmimin “Artistja e huaj më e mirë” për vitin 2023, për interpretimin e “Suor Angelica” në Barcelonë.