Ambasadori i Spanjës në Shqipëri, Gabriel Cremades, zhvilloi një takim me drejtoreshën e Bibliotekës Kombëtare të Shqipërisë, Majlinda Toçi, në kuadër të angazhimit të të dy vendeve për promovimin e kulturës, trashëgimisë dhe bashkëpunimit institucional.

Sipas ambasadës spanjolle, gjatë takimit u diskutuan bashkëpunimet e ardhshme ndërmjet Ambasadës së Spanjës dhe Bibliotekës Kombëtare, veçanërisht në kuadër të organizimit të “Javës Kulturore të Spanjës” në Shqipëri, të një ekspozite të rëndësishme historike si dhe të një konference letrare.

Gjatë vizitës në ambientet e Bibliotekës, ambasadorit, iu prezantua një pjesë e koleksioneve të çmuara me libra të vjetër dhe fondit historik, si dhe laboratorin e restaurimit, ku punohet për ruajtjen dhe konservimin e kësaj trashëgimie të rëndësishme letrare.

Gjithashtu, u shqyrtua mundësia e krijimit të një “Këndi të Letërsisë Spanjolle” në Bibliotekën Kombëtare, si një hapësirë e dedikuar për afrimin e letërsisë dhe kulturës spanjolle me publikun shqiptar.

Spanja mbetet e përkushtuar ndaj promovimit të kulturës dhe ruajtjes së trashëgimisë historike në të gjitha fushat e saj.