Kryeministri Edi Rama deklaroi sot, në Asamblenë e Përgjithshme të Kombeve të Bashkuara në Nju-Jork, se Shqipëria është vendi i parë që solli një instrument të inteligjencës artificiale në arkitekturën e qeverisë përmes Diellës, ministres së inteligjencës artificiale.

Rama theksoi se “kjo nuk u bë për të transferuar sovranitetin nga njerëzit te makina”.

Por, sipas tij, synimi është për t’i bërë shërbimet publike më të aksesueshme, procedurat më transparente dhe shtetin më llogaridhënës.

“Asnjë makinë nuk mbart legjitimitet demokratik, asnjë algoritëm nuk trashëgon përgjegjësi kushtetuese. Pas çdo vendimi me ndikim publik duhet të mbetet një mandat ligjor, një institucion njerëzor e një emër që mund të thirret për t’u përgjigjur”, theksoi Rama.

Rama theksoi se brenda një vendi inteligjenca artificiale mund të reduktojë distancën midis qytetarëve dhe shërbimeve publike.

“Ndërkohë që inteligjenca artificiale jashtë llogaridhënies mund të eliminojë distancën midis gënjeshtrës dhe mendjes njerëzore”, shtoi ai.

Burimi ATSH