Shqipëria dhe Emiratet e Bashkuara Arabe do të ngrenë një taskforcë të përbashkët për luftën kundër krimit të organizuar.

Lajmin e bëri të ditur sot në një prononcim për mediet nga Abu-Dabi, ministri i Brendshëm Taulant Balla.

Balla u takua në Abu-Dabi me homologun e tij Saif Bin Zayed Al Nayan, me të cilin diskutoi lidhur me çështjet e bashkëpunimit dypalësh në fushën e sigurisë, si dhe për ngritjen në një nivel tjetër të bashkëpunimit edhe sa i përket ekstradimeve dhe emergjencave civile.

Në një prononcim për mediet pas takimit, Balla vlerësoi se marrëdhëniet me Emiratet e Bashkuara Arabe (EBA) janë në nivelin e tyre më të mirë, kjo falë edhe një raporti të drejtpërdrejtë bashkëpunimi mes presidentit, Lartësisë së Tij Sheikut Mohamed Bin Zayed dhe kryeministrit Rama.

Balla informoi se me ministrin Saif Bin Zayed Al Nayan diskutuan edhe mbi marrjen e eksperiencës së vyer të EBA-s, për sa i përket teknologjisë në menaxhimin e trafikut si dhe identifikimit të personave të kërkuar.

“Kemi kërkuar marrjen e asistencës nga ana e qeverisë dhe e Agjencisë së Mbrojtjes Civile në mënyrë që të përballojmë disa prej sfidave që kemi përpara. Po shkojmë drejt sezonit të verës dhe kujtova këtu faktin që vitin e kaluar kemi pasur një numër të konsiderueshëm zjarresh, 834 zjarre, të cilat është e pamundur të përballohen vetëm nga gjithë ekipet tona dhe infrastruktura që kemi për mbrojtjen kundër zjarrit”, tha ai.

Po ashtu, Balla informoi se temë e takimit ishin edhe çështje që lidhen me bashkëpunimin mes Interpol Tiranës dhe Interpol Abu-Dabit, si dhe ekstradimi drejt Shqipërisë i personave të kërkuar nga drejtësia shqiptare.

(ATSH)