Skema e re kombëtare e mbështetjes për fermerët pritet të finalizohet brenda javës së ardhshme, pas përfundimit të procesit të konsultimeve me fermerët në të gjithë vendin.

Ministri i Bujqësisë dhe Zhvillimit Rural, Andis Salla, gjatë seancës dëgjimore në Komisionin për Bujqësinë, Zhvillimin Rural dhe Ushqimin, deklaroi se skema po hartohet mbi bazën e informacionit të mbledhur në 23 takime të zhvilluara në terren dhe se shumë shpejt do të dalë rezultati konkret përfundimtar.

Salla theksoi se një nga shtyllat kryesore të skemës së re do të jetë formalizimi i sektorit bujqësor, përmes mekanizmit të rimbursimit 10% të autofaturave për çdo faturë të depozituar pranë autoriteteve tatimore.

Ministri bëri të ditur se po shqyrtohet hapja e një mase të re mbështetjeje për sektorin e akuakulturës, përveç mbështetjes ekzistuese për peshkimin.

Ndërkohë, në paketën e parë të investimeve me grant 50%, mbi 800 projekte janë paraqitur pranë AZHBR-së, me një buxhet rreth 3 miliardë lekë.

“Lista e re e përfituesve pritet të publikohet në ditët në vijim, ndërsa aplikantët që nuk do të përfitojnë do të kenë mundësi të përfshihen në skemën e re”, tha Salla.

Burimi ATSH