Në një raportim në Bashkimin Evropian, Avokati i Popullit Endri Shabani ngriti sot shqetësimin mbi dështimet strukturore që po cenojnë të drejtat themelore të qytetarëve në Shqipëri, duke u ndalur ekskluzivisht te sfidat e sistemit të drejtësisë dhe cenimi i të drejtës së pronës.

Gjatë fjalës së tij, në punimet e takimit të 17-të i Nënkomitetit për Drejtësinë, Lirinë dhe Sigurinë (JFS), i cili operon në kuadër të Marrëveshjes së Stabilizim-Asociimit ndërmjet Bashkimit Evropian dhe Shqipërisë, Shabani theksoi se këto problematika kërkojnë ndërhyrje emergjente nga autoritetet kombëtare.

“Vonesat e tepruara në sistemin e drejtësisë po mohojnë aksesin në drejtësi dhe të drejtën për një proces të rregullt ligjor. Të dhënat e institucionit tregojnë se çështjet që lidhen me pronat dhe proceset gjyqësore përbëjnë numrin kryesor të ankesave. Vonesat e tepruara gjyqësore nuk janë thjesht zvarritje procedurale; ato po komprometojnë strukturalisht të drejtën e qytetarëve për një proces të rregullt ligjor, duke e kthyer kolapsin e sistemit në një mohim të vetë drejtësisë”, tha Shabani.

Ai shtoi se kjo problematikë në sistem gjithashtu ndikon begatimin ekonomik të qytetarëve.

“Kur qytetarët detyrohen t’u drejtohen gjykatave për të zgjidhur këto mosmarrëveshje, vonesat e stërzgjatura bëjnë që asetet e tyre të bllokohen për vite me radhë duke prodhuar edhe një dëm ekonomik. Ky kryqëzim i mosfunksionimit administrativ me vonesat gjyqësore kufizojnë të drejtën e pronës duke i kufizuar qytetarët nga mjetet ligjore dhe duke i lënë pa mbrojtje reale”, u shpreh Shabani.

Ai preku edhe çështjen e numrit të lartë të paraburgosurve në sistemin peritenciar shqiptar.

“Përdorimi i paraburgimit si standard po mbingarkon burgjet duke rënduar kushtet ku qëndrojnë të burgosurit, sidomos ata që kanë probleme me shëndetin mendor. Paraburgimi duhet të jetë përjashtim, jo normë, nëse do të respektojmë parimin e prezumimit të pafajësisë”, deklaroi Shabani,.

Takimi 17-të i Nënkomitetit për Drejtësinë, Lirinë dhe Sigurinë (JFS) shërben si një forum teknik dhe politik ku përfaqësuesit e qeverisë shqiptare dhe Komisionit Evropian diskutojnë progresin e Shqipërisë në fushat kyçe të shtetit të së drejtës.

Burimi ATSH