Presidenti i Republikës së Shqipërisë, Bajram Begaj, shprehu mbështetjen e tij për Princeshën e Uellsit Kate Middleton përmes një mesazhi në rrjetet sociale, pasi ajo deklaroi se ishte diagnostikuar me kancer.

Në rrjetin social “X”, Presidenti Begaj uroi për një shërim të shpejtë dhe të plotë për Princeshën, duke theksuar forcën dhe hirin që e karakterizon atë.

“Lutje të sinqerta për një shërim të shpejtë dhe të plotë për Princeshën Kate—shpresojmë ta kalojë këtë sfidë me forcën që e karakterizon,” shkroi ai.

Lajmi për diagnostikimin e saj me kancer vjen dy muaj pasi princesha e Uellsit u largua përkohësisht nga jeta publike, pasi siç u raportua iu nënshtrua një operacioni për një gjendje abdominale jo kancerogjene në muajin janar.

Përmes një video-mesazhi, Kate Middleton tha se ishte një “shok i madh” pas “dy muajsh tepër të vështirë”.