Nga Luela Myftari

Ne …

I vetmi vend që rrethohet nga shqiptarët e vet. Kufijtë e muret thonë se i vendosim vetë.

Prirem ta besoj kur kaloj kufirin, andej nga Konispoli nga ku erdhën fëmijë të katërt gjyshërit e mi, e vijoj të dëgjoj që flasin shqip, ndonëse ndonjëherë fshehurazi.

Edhe kur shkoj në Manastir, apo teksa kaloj kufirin e Maqedonisë. Dëgjoj shqip.

Kur dua të marr aeroplanin në Shkup, gjithmonë qëndroj një ditë aty, të bindem prapë që asnjë vulë s’më ndalon të flas edhe aty shqip. Të blej shqip. Të këndoj shqip. Të jetoj shqip.

Ngado t’i bie për në Preshevë. Marr vulën serbe, po kufiri nuk ma zbeh shqipen kur mblidhemi dhe këndojmë “Bareshën”. Edhe në Vermosh tej të kaloj kufirin drejt Plavës e Gucisë, aty në Vuthaj, malet e Shqipërisë më jehojnë shqip…

Kosova është e lirë sot të vijë sa herë të dojë ta mbushë stadiumin tonë me këngën shqipe. Familjet shqiptare të Kosovës që u mblodhën në Pallatin e Sportit “Asllan Rusi”, shkatërruar i lanë shtëpitë, pranë nesh gjetën shtëpi. Tashmë janë kthyer në banesat e tyre. Të lirë.

Mikeshat e mia Albulena Malsori Krasniqi e Rina Malsori ato që në klasë i pata janë kaq të bukura e të suksesshme sot në vendin e tyre. Të lira, të këndojnë shqip në vendin e gjyshërve. Pas tyre, shqiptarët e Kosovës veç gëzim më kanë përcjellë sa herë me ta kam punuar. Sot, me një shqiptare të Kosovës do dal të festoj.

E lirë si ajo të këndoj shqip. Alba Alishani , Glauku, Saranda, Isuf Kurtaj , Jetoni… Ideal Gola , plot miq kam nëse shkoj në Kosovë. Unë mbeta vajza që s’u kthye dot të hapë derën e gjyshes së vet.

Dhe si unë janë shumë vajza dhe djem, shqiptarë të Çamërisë, që dyert e gjyshërve i prekin veç mes kujtimeve. Çamëria është plaga e atyre shqiptarëve që s’u kthyen dot kurrë, as sot 80 vite pas masakrave. Por, së paku jemi të lirë ta themi këtë e mos harrojmë t’i kujtojmë njëri-tjetri sa gjak u derdh, sa lot kanë rrjedh, sa dashni duhet me bjerr.

Kosovë e lirë qofsh përherë! Dhe thirr fort, krenare, stoike për shtëpitë që gjyshërit ndërtuan në atë dhé.

Gëzuar Kosovë!