Ministri i Bujqësisë dhe Zhvillimit Rural, Andis Salla, nënshkroi sot në Tiranë Memorandumin e Mirëkuptimit me kryetaren e Komunës së Preshevës, Ardita Sinani, për forcimin e bashkëpunimit në fushën e bujqësisë dhe zhvillimit rural.

Marrëveshja synon të krijojë një kornizë bashkëpunimi ndërinstitucional për zhvillimin dhe modernizimin e praktikave bujqësore, mbështetjen e fermerëve shqiptar në Preshevë dhe rritjen e kapaciteteve teknike e profesionale në sektorin bujqësor.

“Përmes këtij memorandumi synojmë të mbështesim më konkretisht komunitetin shqiptar të Preshevës në bujqësi, të nxisim shkëmbimin e përvojës dhe njohurive profesionale, si dhe të krijojmë mundësi për projekte të përbashkëta dhe akses në fondet e Bashkimit Europian,” u shpreh ministri Salla.

Ai theksoi se bashkëpunimi do të fokusohet edhe në zhvillimin e nën-sektorëve prioritarë të bujqësisë, si prodhimi bimor, blegtoria, bletaria dhe mikro-përpunimi shtëpiak e artizanal i produkteve agro-ushqimore, si dhe në mbështetjen e investimeve bujqësore dhe rurale dhe forcimin e zinxhirit të vlerës agro-ushqimore.

Sipas ministrit Salla, ky bashkëpunim do të kontribuojë në krijimin e më shumë mundësive për fermerët dhe në forcimin e lidhjeve mes komuniteteve shqiptare në rajon, duke mbështetur zhvillimin e qëndrueshëm të sektorit bujqësor.

Burimi ATSH