Kryetarët e bashkive Durrës, Lezhë dhe Shkodër zhvilluan sot në Tiranë një takim pune me përfaqësues të pushtetit vendor nga Kosova.

Të pranishëm në këtë takim ishin edhe drejtoresha Ekzekutive e Shoqatës Kombëtare të Bashkive të Shqipërisë, Adelina Farrici, si dhe drejtuesi i Asociacionit të Komunave të Kosovës, Agim Aliu.

Në këtë diskutim të hapur dhe konstruktiv u ndanë përvoja mbi mënyrën se si funksionon qeverisja vendore në të dy vendet, me fokus të veçantë te procesi i decentralizimit dhe roli i pushtetit vendor në ofrimin e shërbimeve për qytetarët.

Sipas kreu të bashkisë Shkodër, Benet Beci, përvoja e Kosovës në këtë drejtim ofron një perspektivë interesante, ndërsa dialogu mes institucioneve krijon mundësi për të reflektuar mbi hapat e ardhshëm, veçanërisht në kontekstin e diskutimeve për rishikimin e reformës territoriale-administrative në Shqipëri.

Beci tha se “shkëmbimi i ideve dhe bashkëpunimi mes pushtetit vendor mbeten një rrugë e rëndësishme për të ndërtuar institucione më të forta dhe më pranë komunitetit”.

Zyra për mediet pranë bashkisë Shkodër, njoftoi se në këtë takim të pranishëm ishin edhe përfaqësues të tjerë të pushtetit vendor të Shqipërisë dhe Kosovës, mes tyre Gëzim Topçiu, Tonin Marinaj, Bali Muharremaj, Shaqir Totaj dhe Gazmend Muhaxheri.

Burimi ATSH