Ambasada e Italisë në vendin tonë ka reaguar në lidhje me zhvillimet më të fundit në Parlament, ku disa seanca u karakterizuan nga tensionet dhe tymit i flakadanëve të ndezur nga deputetët e opozitës.

Në një postim në rrjete sociale, Ambasada italiane u bën thirrje palëve që të punojnë së bashku për të siguruar që Parlamenti të mund të ushtrojë detyrën e tij në interes të të gjithë shtetasve.

“Ambasada e Italisë në Tiranë shpreh shqetësim për zhvillimet më të fundit në Parlamentin shqiptar. Një Parlament funksional dhe një dialog frytdhënës midis deputetëve të zgjedhur janë thelbësorë për funksionimin e duhur të demokracisë”, thekson Ambasada.

Në reagim, Ambasada thekson më tej: “Nxisim shumicën dhe opozitën të punojnë së bashku për të siguruar që Parlamenti të mund të ushtrojë detyrën e tij në interes të të gjithë shtetasve.”