Kryeministri Edi Rama deklaroi sot se “minoriteti grek në Shqipëri është një thesar i kulturës sonë të bashkëjetesës dhe një urë e pazëvendësueshme për ta ushqyer dhe për ta forcuar miqësinë mes dy popujve”.

Në një intervistë për televizionin publik grek “ERT News”, Rama u shpreh se është tërësisht e pavërtetë në terrenin e fakteve pretendimi se minoriteti grek në Shqipëri trajtohet me një sy skeptik nga sistemi politik shqiptar.

“Ka 80 vite që ka mbaruar Lufta e Dytë Botërore dhe akoma sot Greqia ka në fuqi ligjin e luftës, gjë që është një arkaizëm i madh dhe gjë për të cilën ne jemi shumë të interesuar që ta shohim të largohet një herë e përgjithmonë nga rruga jonë e përbashkët”, theksoi ai.

Ndërkohë, Rama tha se beson shumë tek miqësia, tek partneriteti strategjik dhe tek interesi i madh i përbashkët i Shqipërisë dhe Greqisë për të forcuar sa më shumë këtë miqësi.

“Ashtu sikundër besoj në faktin e thjeshtë që minoriteti grek në Shqipëri është një thesar i kulturës sonë të bashkëjetesës dhe një urë e pazëvendësueshme për ta ushqyer dhe për ta forcuar miqësinë mes të dy popujve, mes të dy shteteve dhe patjetër edhe mes dy qeverive, pavarësisht se kush qeveris në Tiranë dhe pavarësisht se kush qeveris në Athinë”, theksoi ai. /ATSH