Ministri për Evropën dhe Punët e Jashtme, Ferit Hoxha priti sot në takim të dërguarin special të Shteteve të Bashkuara për Partneritetet Globale, Paolo Zampolli.

Takimi u përqendrua në mundësitë për thellimin e mëtejshëm të partneritetit strategjik ndërmjet Shqipërisë dhe Shteteve të Bashkuara, me vëmendje të veçantë te zgjerimi i bashkëpunimit ekonomik, rritja e shkëmbimeve tregtare dhe nxitja e investimeve amerikane në Shqipëri.

Bashkëbiseduesit riafirmuan marrëdhënien e veçantë dhe miqësinë e qëndrueshme mes dy vendeve, si dhe vullnetin e përbashkët për ta përkthyer këtë afërsi në partneritete të reja dhe përfitime konkrete për qytetarët dhe ekonomitë e tyre.

Ministri Hoxha theksoi se lidhja transatlantike mbetet gurthemeli i sigurisë së Shqipërisë dhe një mbështetje thelbësore për qëndrueshmërinë demokratike.

“Fuqia e miqësisë sonë qëndron edhe në aftësinë për të krijuar mundësi të reja bashkëpunimi, të cilat sjellin lidhje më të ngushta, më shumë prosperitet dhe përfitime të prekshme për të dy vendet dhe popujt tanë”, u shpreh ministri Hoxha.

Takimi konfirmoi angazhimin për të identifikuar fusha dhe iniciativa konkrete që do t’i japin një shtysë të re bashkëpunimit shqiptaro-amerikan, veçanërisht në dimensionin ekonomik të partneritetit strategjik.

Burimi ATSH