Në mjediset e Universitetit Politeknik të Tiranës u prezantua sot projekti fitues për ndërtimin e selisë së re të ambasadës së Italisë. Me këtë projekt Ministria e Jashtme italiane synon të ndërtojë një seli të vetme për Ambasadën e Italisë, Institutin Italian të Kulturës si edhe Agjencinë për Promovimin jashtë Italisë dhe Ndërkombëtarizimin e Sipërmarrjeve italiane (ICE).

Selia e re, e cila do të projektohet nga një bashkim operatorësh ekonomikë i drejtuar nga ARS Progetti S.P.A., do të karakterizohet nga elementë si eleganca, funksionaliteti, estetika dhe do të jetë e hapur për të gjithë shtetasit, si dëshmi e lidhjes së hershme midis Italisë dhe Shqipërisë.

Në konferencën për shtyp morën pjesë dekani i Fakultetit të Arkitekturës, Armand Vokshi, ambasadori i Italisë, Fabrizio Bucci, ministrja e Kulturës, Elva Margariti, kryetari i bashkisë Tiranë, Erion Veliaj dhe administratori i Deleguar i “Ars Progetti”, Daniele Fanciullacci.

Pas konferencës për shtyp u vijua me një leksion drejtuar studentëve të arkitekturës mbi perspektivën e profesionit të tyre në të ardhmen, mbi kompleksitetin e projekteve në Shqipëri dhe në botë si edhe mbi sfidat e “të bërit arkitekturë” mes traditës dhe novacionit me fokus tranzicionin energjetik.