Fushata e dhurimit të gjakut vijon në Fier, Vlorë, Gjirokastër dhe Tiranë.

Ministrja e Shëndetësisë dhe Mbrojtjes Sociale, Albana Koçiu, bëri të ditur se “me përkushtim dhe solidaritet, qytetarë nga çdo cep i vendit po i bashkohen kësaj nisme jetike, duke dhuruar gjak dhe shpëtuar jetë”.

“Mirënjohje për të gjithë ata që kontribuojnë në mënyrë të vazhdueshme, një gjest i vogël që bën një ndryshim të madh!”, shkruan Koçiu në një postim në rrjetet sociale.

Këtë vit, motoja e përzgjedhur është “Dhuro gjak, dhuro shpresë: së bashku shpëtojmë jetë”.

Në vitin 2024 janë regjistruar 9 665 dhurime vullnetare dhe 28 557 familjare, ndërsa vetëm në 5 muajt e parë të vitit 2025 janë regjistruar 4 050 dhurime vullnetare dhe 8074 familjare.

Objektivat e fushatës për 2025 janë rritja e ndërgjegjësimit të publikut për nevojën kritike për dhurimin e gjakut dhe plazmës dhe ndikimin që ato kanë në jetën e pacientëve, inkurajimi i dhuruesve të rinj dhe ekzistues që të japin gjak rregullisht, nxjerrja në pah e ndikimit pozitiv të dhuruesve të gjakut në shëndetin dhe mirëqenien e të tjerëve nëpërmjet dhurimit të gjakut.

Burimi ATSH