Zëvendëskryeministrja dhe njëherësh ministre e Infrastrukturës dhe Energjisë, Belinda Balluku, ka bërë të ditur sot se gjatë gjashtë ditëve të para të korrikut 2025 është regjistruar një rritje prej 20% e konsumit të energjisë elektrike në krahasim me të njëjtën periudhë të një viti më parë.

Në një deklaratë për mediet, Balluku theksoi se rritja e kërkesës për energji është pasojë jo vetëm e temperaturave të larta, por edhe e zgjerimit të aktivitetit turistik.

“Gjatë javës së parë të korrikut 2024, kërkesa mesatare ditore ishte rreth 18,6 milionë kilovatorë, ndërsa këtë vit në të njëjtën periudhë kemi arritur në 22,4 milionë kilovatorë. Ky është një tregues i qartë i rritjes së konsumit”, tha ajo.

Ministrja nënvizoi se, pavarësisht rritjes së ndjeshme të ngarkesës, puna në terren nga grupet e OSHEE ka qenë efikase dhe ndërprerjet kanë qenë minimale.

“Grupet e OSSH-së kanë reaguar në kohë rekord për të menaxhuar çdo situatë që ka ardhur si pasojë e ngarkesës. Të gjitha avaritë janë sistemuar pa vonesa”, u shpreh Balluku.

Ajo siguroi qytetarët se mbi 1,600 punonjës të OSHEE Group janë në terren dhe në krye të detyrës për të garantuar një shërbim të pandërprerë dhe cilësor gjatë gjithë sezonit të verës.

Burimi ATSH