Zëvendëskryeministrja Albana Koçiu ka reaguar kundër dhunës gjatë protestave, duke theksuar se pasojat e akteve të vandalizmit rëndojnë mbi qytetarët, bizneset dhe taksapaguesit.

Në një postim në rrjetet sociale, Koçiu thekson se Shqipëria ka nevojë për më shumë demokraci dhe dialog, e jo për kaos, dhunë dhe përplasje.

“Ky nuk është zëri i rinisë”, shkruan Koçiu, duke iu referuar hedhjes së gurëve, përdorimit të molotovëve, dëmtimit të bizneseve dhe plagosjes së efektivëve të policisë.

Sipas saj, këto akte nuk përfaqësojnë një ideal, por janë “vandalizëm i maskuar si ideal”.

Zëvendëskryeministrja ndalet edhe te kostot që sjellin dëmtimet gjatë protestave, duke përmendur bizneset e dëmtuara, institucionet e djegura, dëmtimin e rrugëve dhe sinjalistikës, si dhe shpenzimet për pastrimin dhe sigurinë, të cilat, sipas saj, përballohen nga qytetarët.

Në reagimin e saj, Koçiu shpreh mbështetjen për Policinë e Shtetit, duke nënvizuar se pas çdo uniforme qëndron një njeri që meriton të kthehet i sigurt pranë familjes.

“Mbështes Policinë e Shtetit”, shkruan ajo, duke theksuar se qytetarët nuk janë vetëm ata që protestojnë, por edhe punonjësit, pronarët e bizneseve dhe taksapaguesit që përballen me pasojat e dhunës.

“Dhuna nuk e mbron një kauzë. E shkatërron atë”, përfundon reagimin zëvendëskryeministrja Koçiu.

Marrë nga ATSH