Kryeministri Edi Rama shprehu sot ngushëllimet për ndarjen nga jeta të Artan Lames në moshën 58-vjeçare, pas një ndërhyrje në zemër.

Në një postim në rrjetet sociale, Rama e cilësoi të befasishëm lajmin e ndarjes nga jeta të Lames.

“I pabesueshëm, po fatkeqësisht i vërtetë lajmi i befasishëm i ndarjes nga jeta të Artan Lames. Jam pa fjalë. Ngushëllime Mirelës, djalit të tyre dhe familjes e shokëve të përbashkët”, tha Rama.

Lame ndërroi jetë në Gjermani pas një ndërhyrje në zemër. Artan Lame ishte publicist, koleksionist shqiptar, studiues i historisë shqiptare, veprimtar i shoqërisë civile për mbrojtjen e trashëgimisë kulturore shqiptare.

Gjatë karrierës së tij, Lame ka qenë Drejtor i Trashëgimisë Kulturore në Ministrinë e Kulturës, nënkryetar i bashkisë së Tiranës, Zëvendësministër i Territorit dhe Turizmit, Drejtor i Përgjithshëm i ALUIZNI-t (Agjencia e Legalizimit, Urbanizimit dhe Integrimit të Zonave Informale), Drejtor i Përgjithshëm i ASHK (Agjencia Shtetërore e Kadastrës).

Burimi ATSH