Kryeministri Edi Rama, njëkohësisht edhe kryetari i Partisë Socialiste zhvilloi sot takimin elektoral përmbyllës për qarkun Dibër.

Gjatë fjalës së tij, Kryeministri foli sërish për rëndësinë e votës së shqiptarëve në 11 maj, pasi sipas Ramës nuk bëhet fjalë për të pasur numrat për krijimin e qeverisë, sepse kjo nuk diskutohet, por është fjala për një krijimin e një fuqie vendimmarrëse që të ecet përpara dhe të mbyllen negociatat me BE-në.

Sipas Ramës, Shqipëria në BE është një Shqipëri e re, hapësirë e re, një horizont i ri, një shpresë krejt e re sidomos për gjeneratën e re.

“Shqipëria në BE nuk është më vetëm. Nëse sot kemi bërë shumë punë edhe me mbështetjen e BE-së për infrastrukturën, shëndetësinë, arsimin, e gjithë ndihma e tyre në gjithë këto vite ka qenë 1 miliard e diçka më shumë euro. Kur të bëhemi anëtarë do i marrim çdo vit 1 miliardë e diçka më shumë euro nga ajo shtëpi e përbashkët. Ajo funksionon si shtëpitë tona, kush është më i rritur ndihmon më të vegjlit. Për bujqësinë kemi bërë agroturizma, pika grumbullimi me ndihmën e tyre, po kemi marrë shumë më pak se 200 milionë euro. Në momentin që hyjmë në BE marrim 300 milionë euro çdo vit”, tha ai.

Kryeministri nënvizoi faktin se “kjo është një e ardhme që deri dje ka qenë një ardhme e largët”.

“Sot është një e ardhme që është këtu. Është në dorën tonë. Ne duhet me 5-ën ta kthejmë në të tashme të Shqipërisë, të shqiptarëve”, tha Rama.

Rama përsëriti lutjen drejtuar grave dhe vajzave të këtij qarku që të bëjnë çdo përpjekje që të bashkojnë mikeshat, fqinjët, shoqet dhe këdo tjetër në këto zgjedhje.

“PS dhe PD nuk janë çështja kryesore e 11 majit. Çështja kryesore është një shpresë e re për Shqipërinë me BE, në Evropë, apo Shqipëria e gjitha pas një plaku të pashpresë, të lodhur dhe të mbaruar që nuk di ku e vuri kryefjalën dhe ha rrugës kallëzuesin. Kjo është zgjedhja! Midis të mirës së përbashkët të një populli të tërë dhe interesit të një grushti njerëzish. Rruga e Arbrit nuk është rruga e socialistëve, por e socialistëve, e demokratëve, sepse mbi të gjitha është rruga e dibranëve, bulqizakëve, matjanëve. Prandaj, në 11 maj nuk duhet shkuar me fanellë partie, por me flamurin kuqezi”, pohoi Rama.

“Keni parë flamur të PS-së në takimet tona? Jo! Sepse në 11 maj PS nuk është qëllimi, është një mjet, është makina ku duhet hipur për të vazhduar para. Rruga është BE, rruga është e këtij flamuri të Skënderbeut, profetit të historisë sonë që e ka lënë profecinë kur i vendosi barrikadën atje në Krujë, kur përcaktoi fatin tonë me perëndimin jo me lindjen. Është kur rilindësit e mbrojtën me gjuhën tonë dhe na e lanë të shkruar në shqip “diell për ne shqiptarët lind andej nga perëndon”, është rruga e popullit që doli në rrugë dhe tha “E duam Shqipërinë si gjithë Evropa”, pohoi Kryeministri.

Në fund të fjalës së tij, kreu i qeverisë cilësoi se PS është makina që nuk mund të lihet për t’i hipur një gomari që ka samarin blu.

“Merr makinën dhe shko plumb pushke në BE”, përfundoi Rama.

Burimi ATSH