Kryeministri Edi Rama bëri të ditur sot se qeveria do të fillojë investimin për prodhimin e veshjeve dhe uniformave ushtarake të Forcave të Armatosura dhe të Policisë.

Gjatë prezantimit të projektit për rigjallërimin e ish-Uzinës së Autotraktorëve, Rama u shpreh se shumë shpejt këto investime do të jetë në funksion të industrisë ushtarake në vendin tonë.

“Edhe në këtë aspekt i kemi të gjitha mundësitë që të bëjmë prodhime të cilësisë shumë të lartë dhe të krijojmë vende pune dhe furnizojmë Forcat e Armatosura apo te ato të rendit me uniforma shumë cilësore dhe më pak të kushtueshme”, shtoi Rama.

Kjo, sipas Kryeministrit, krijon një bazë prodhuese që do të mund t’i shërbejë edhe qëllimit të eksportit në këto mijëra m2 që sot janë jashtë çdo funksioni.

Kryeministri siguroi se do të krijohet një hapësirë ku do të ketë punë, ekonomi dhe zhvillim.

Kryeministri e konsideroi po ashtu teori konspiracioni pretendimet se në ish-Uzinën e Autotraktorëve do të krijohej një vatër rreziku për jetët e njerëzve.

“Është krijuar një shqetësim siç ndodh zakonisht në Shqipëri kur ‘mali mbarset për të pjellë një mi’. Ishte detyrim i yni t’ju sqarojmë nga afër që të mos zhvillohet më tej gjithë ajo teori konspiracioni që këtu do të krijohet një vatër rreziku për jetët e njerëzve, një çmenduri e vërtetë”, tha Rama.

Burimi ATSH