Projekti i AKSHI-t për harmonizimin e legjislacionit shqiptar me Acquis të Bashkimit Evropian përmes Inteligjencës Artificiale është përzgjedhur ndër 360 projektet më të mira digjitale (nga pothuajse 1000 aplikime) për të kaluar në fazën e votimit publik, për çmimet WSIS 2025 (Samiti Botëror mbi Shoqërinë e Informacionit).

AKSHI njoftoi sot se pas aplikimit, u njoftuan se janë nominuar zyrtarisht në kategorinë AL C7 – E-Qeverisja.

Votimi është i hapur edhe për institucionet publike.

Harmonizimi i legjislacionit shqiptar me atë të Bashkimit Evropian vjen ndërsa Shqipëria punon me shpejtësi për hapjen e grup-kapitujve të tjerë të negociatave ndërsa janë hapur dy grup-kapitujt e parë.

Përdorimi i inteligjencës artificiale do të përshpejtojë procesin, për të cilin vendeve të tjera iu janë dashur vite, ndërsa do kursejë kohë dhe energji në negociata.

Vendi ynë ka vendosur si objektiv në dakordësi me Komisionin Evropian hapjen e të gjithë grup-kapitujve të negociatave Brenda këtij viti dhe mbylljen e tyre deri në vitin 2027, me synim ambicioz për anëtarësim në vitin 2030.

Moduli AI i zhvilluar brenda platformës së integrimit evropian dhe anëtarësimit përdoret çdo ditë nga më tepër se 1400 ekspertë integrimi.

Përkthimi i 200 mijë faqeve të qindra ligjeve për të mbyllur negociatat për 27 kapituj i ka marrë Kroacisë 7 vjet dhe shumë kosto, ndërsa Shqipëria synon ta mbyllë përmes këtij moduli në 7 muaj.

Projekti “Harmonizimi i Legjislacionit Shqiptar me Acquis-në e BE-së i mbështetur nga AI” ndodhet në kategorinë AL C7 – E- dhe afati për votim është deri më 30 prill.

Sipas organizatorëve, 18 projektet fituese do të shpallën së bashku me 72 projekte kampione në ceremoninë e çmimeve WSIS në aktivitetin e nivelit të lartë që do të mbahet në 8 korrik.

Konkursi i çmimeve WSIS organizohet në përgjigje të kërkesave nga WSIS për të krijuar mekanizma efikase në përzgjedhjen e projekteve dhe aktiviteteve që përdorin fuqinë e informacionit dhe teknologjitë e komunikimit për të avancuar zhvillimin e qëndrueshëm.

Që nga konceptimi, konkursi ka tërhequr më shumë se 300 mijë aktorë të këtyre fushave.

Burimi ATSH