Kryeministri Edi Rama, njëherësh kryetar i Partisë Socialiste bëri të ditur sot se në Berat janë realizuar 106 investime në fushën e bujqësisë dhe agropërpunimit ku një peshë të rëndësishme e ka zënë mbështetja nga buxheti i shtetit ose programi IPARD me grante.

Rama zhvilloi sot një takim me fermerët në Berat, për të folur për bujqësinë dhe zhvillimin rural.

Kryeministri e zhvilloi takimin në ambientet e një pike grumbullimi e cila eksporton në rreth 50 vende të botës, përfshirë edhe SHBA.

“Më vjen jashtëzakonisht mirë kur shoh çfarë kemi bërë në këtë qark. Është realisht një volum i madh pune të përbashkët, ku patjetër merita kryesore i takon të gjithë atyre që punojnë me tokën, me prodhimet, që prodhojnë, grumbullojnë, përpunojnë dhe eksportojnë”, tha Rama.

Por nga ana tjetër, kryeministri nënvizoi se “pa bashkëpunimin që kemi pasur dhe pa mbështetjen në rritje që ne i kemi dhënë sektorit do të ishin shumë të vështira këto zhvillime.

Rama kujtoi se në momentin që PS ka marrë detyrën, sipërfaqja e ujitur në Shqipëri ishte 120 mijë hektarë dhe sot sipërfaqja e ujitur është 270 mijë hektarë.

“Është më shumë se sa dyfishuar sipërfaqja e ujitur që do të thotë se bujqësia jonë për të cilën thuhen shumë gjëra të pavërteta sot, shfrytëzon një kapacitet më shumë se dyfish të tokës, që është baza e patjetërsueshme e saj”, shtoi Rama.

Rama theksoi se qarku i Beratit ka një aktivitet të madh, por që ka qenë ndër më aktivët në bashkëpunimin me strukturat e qeverisë.

“Nga njëra anë vetëm në këtë dekadë ne kemi mbështetur dhe realizuar 47 projekte të infrastrukturës për ujitjen dhe kullimin, digat dhe për mbrojtjen nga përmbytjet, duke prakitikisht e shtuar me 4600 ha të tjera të reja kapacitetin prodhues. Kemi rehabilituar kilometra të tëra argjinaturash dhe kemi mbështetur blerjen e makinerive për mirëmbajtje dhe vaditje”, tha Rama.

Kryeministri u ndal te zhvillimi i madh që kanë njohur në këtë dekadë pikat e grumbullimit.

“Mbi 70 pika grumbullimi janë mbështetur nga programet tona, ashtu sikundër janë financuar 16 tregje për produktet bujqësore. Janë krijuar 400 pika të reja përpunimi. Në Berat janë realizuar 106 investime ku një peshë të rëndësishme e ka zënë mbështetja nga buxheti i shtetit ose programi IPARD me grante”, tha Rama.

Burimi ATSH