Kryeministri njëherësh kryetari i Partisë Socialiste, Edi Rama deklaroi sot nga Erseka në rrugën e re të Vjosës, që do të lidhë bregdetin me juglindjen se “gjenerata jonë sot ka fatin e madh që të ketë në dorë të bëjë hapin e fundit”.

“Kemi nisur këtë rrugëtim njësoj siҫ kemi nisur dhe rrugën këtu. Një rrugë që askush nuk e besonte që do ndërtohej ndonjëherë, ishte premtuar e ri-premtuar. Pastaj ne e nisëm, bëmë një fazë të parë. Pastaj filluam dhe bëmë dhe fazën e dytë, pastaj ndodhi rrëshqitja. Pastaj përsëri u vendosën gjërat në vend. Tani jemi sot këtu duke folur për një tjetër rrugë për një tjetër horizont”, tha Rama.

“Ndërkohë që rrugëtimi ynë qindravjeҫar për t’u vendosur më në fund aty ku na takon si pjesë e pandashme e Evropës është kaq larg. Dhe në këtë pikë ku jemi sot është 11 maji dhe në 11 maj të gjithë duhet të mendojnë për finishin e Shqipërisë. Jo për mandatet dhe votat e partisë, por për finishin e Shqipërisë. Si do të shkojë Shqipëria në atë finish”, theksoi Rama.

“Shqipëria në atë finish do të shkojë vetëm nëse ne nuk humbasim asnjë minutë. Nëse ne negociatat e anëtarësimit që i kemi nisur vjet i mbarojmë brenda 2027-ës, në bazë të planit që kemi dakordësuar me Komisionin Evropian”, tha Rama.

“Llogariteni kurrë asnjëherë, përveҫ rastit të Finlandës, por është histori tjetër dhe shumë vite më parë, asnjë vend nga të gjitha vendet ish-komuniste që kanë negociuar anëtarësimin nuk kanë marrë 3 vjet, kanë marrë shumë më tepër.”, theksoi Rama.

“Ne jemi në një rajon ku negociatat e anëtarësimit Mali i Zi i ka filluar në 2012-ën, Serbia në 2014-ën, Maqedonia e Veriut nuk i ka filluar akoma, ndërkohë që është kandidate që në 2005-ën dhe ne na ka parë Zoti në këtë pikë në këtë moment dhe i ka dhënë shqiptarëve mundësinë që ta kenë fatin në dorë”, u shpreh Rama.

“Tani fati në dorë vjen dhe ikën. Nuk vjen në dorë të rrijë deri sa të zgjohesh ti nga gjumi apo deri sa ti të mbarosh punët e tjera. Kjo është puna kryesore dhe e vetmja që kemi për të mbyllur këtë histori dhe për t’i dhënë fund një historie ku faktikisht shqiptarët kanë qenë në shekuj si një popull i mbetur në rrugë. Si një popull që ka qenë i destinuar të luftojë vetëm për mbijetesë dhe të trajtohet gjithmonë si një qenie e dorës së dytë dhe e dorës së tretë”, theksoi Rama.

“Edhe sot e kemi ne në dorë një dokument, pasaportën me të cilën lëvizim. Ai është një dokument udhëtimi, ne lëvizim, por ne nuk ndalojmë dot, duhet të kthehemi këtu. Nëse duam të ndalojmë atje, atëherë duhet të kërkojmë azil dhe historira të tjera dhe pa llogaritur gjithë mundimet e tjera”, tha Rama.

“Në momentin që ne hyjmë në BE dhe që të gjithë qytetarët e këtij vendi marrin pasaportën evropiane të Shqipërisë, automatikisht ajo pasaportë është lejeqëndrimi, është leje pune, është njohje pensioni, është gjithçka sepse në atë moment për herë të parë në historinë tonë nuk jemi një popull qenie e dorës së dytë në sytë e të tjerëve, por jemi një popull i barabartë sy më sy me të tjerët”, tha Rama.

Burimi ATSH